O DOG ven de publicar unha resolución sobre o modelo normalizado de reclamación e outra relativa á delegación de competencias sobre inadmisións a trámite.
Santiago de Compostela, 17 de xuño de 2026.- A Comisión da Transparencia de Galicia, órgano colexiado independente adscrito ao Consello Consultivo de Galicia, está a adoptar decisións co obxectivo de facer máis áxil os procedementos relativos ao acceso á información pública das Administracións galegas, sempre tendo en conta a normativa reguladora do procedemento administrativo común.
O Diario Oficial de Galicia (DOG) ven de publicar a Resolución do 1 de xuño de 2026 pola que aproba o modelo normalizado de reclamación perante a Comisión da Transparencia de Galicia fronte ás resolucións de acceso á información pública (código de procedemento AP900B). E, xa desde hoxe, a web institucional da Comisión, no apartado “Presenta unha reclamación”, ten operativo o enlace ao modelo normalizado por sede electrónica da Xunta de Galicia.
En concreto, a resolución establece que as reclamacións poderán presentarse por vía electrónica a través do modelo normalizado dispoñible na sede electrónica da Xunta de Galicia. O procedemento de reclamación habilitarase na Guía de procedementos e servizos, co código AP900B “Reclamacións fronte ás resolucións de acceso á información pública”.
DELEGACIÓN
Por outra banda, o DOG tamén publicou a Resolución do 4 de xuño de 2026 pola que se dispón a publicación da delegación de competencia da Comisión da Transparencia de Galicia no presidente. Así, dáse publicidade a un acordo adoptado por unanimidade en sesión ordinaria do 26 de maio de 2026 do órgano colexiado.
O presidente da Comisión da Transparencia de Galicia asumirá as resolucións de inadmisión a trámite por mor da extemporaneidade da reclamación presentada, por incompetencia manifesta da Comisión, e por desistencia da persoa interesada. En calquera caso, a delegación establece que na seguinte sesión plenaria da Comisión darase conta das resolucións adoptadas deste xeito.
