Santiago de Compostela, 25 de maio de 2026.- O presidente do Consello Consultivo de Galicia e Comisionado da Transparencia de Galicia, Andrés Lago Louro, recibiu hoxe a visita da nova presidenta do Consejo de Transparencia y Buen Gobierno, Concepción Campos Acuña, nun encontro institucional que serviu para analizar posibilidades de colaboración futura.
Tanto o Consejo de Transparencia y Buen Gobierno como a Comisión da Transparencia de Galicia iniciaron nestes meses de abril e maio, respectivamente, novas etapas no cumprimento das súas funcións. Así, o encontro, que tivo lugar en Santiago de Compostela, serviu para intercambiar impresións sobre o marco normativo en materia de transparencia e no acceso á información pública.
No caso da Comisión da Transparencia de Galicia, órgano colexiado independente galego encargado de que as administracións respecten o dereito de acceso á información pública que ten toda a cidadanía, desde o 1 de maio deste ano pasa a estar adscrito ao Consello Consultivo de Galicia. Pola súa banda, a nova presidenta da autoridade administrativa independente de garantía en materia de acceso á información pública e transparencia a nivel estatal ocupou o seu cargo o pasado mes abril e está a manter encontros cos seus homólogos nas diferentes comunidades autónomas.
