O órgano colexiado independente resolveu máis de 50 reclamacións de petición de información pública ante as Administracións galegas
Santiago de Compostela, 26 de maio de 2026.- A Comisión da Transparencia de Galicia quedou formalmente constituída e desenvolveu hoxe a súa primeira sesión de traballo desde que, a comezos deste mes de maio, este órgano colexiado independente foi adscrito ao Consello Consultivo de Galicia. A xuntanza serviu para resolver máis de 50 reclamacións de solicitudes de información pública sobre diferentes materias.
Esta primeira sesión, celebrada en Santiago de Compostela, estivo presidida polo titular do Consello Consultivo de Galicia e Comisionado da Transparencia, Andrés Lago Louro. Asemade, asistiron Patricia Brión Cabanelas, en representación da Comisión Interdepartamental de Información e Avaliación da Xunta de Galicia; María Isabel García Garrido, polo Consello de Contas; e Xosé Manuel Rodríguez Méndez, pola Federación de Municipios e Provincias de Galicia (Fegamp); e contou tamén coa participación da letrada Ana Mª López Guizán, como secretaria titular do órgano colexiado.
Entre os asuntos da orde do día que foron abordados, a Comisión da Transparencia de Galicia aprobou un total de 52 resolucións de petición de información pública ante as Administracións galegas que, na súa maioría, facían referencia a materias contractuais, financeiras e urbanísticas. A partir desta data, procederase a notificar aos interesados o acordo adoptado.
O órgano colexiado determinou a delegación na Presidencia da Comisión da Transparencia das resolucións de inadmisión por mor da extemporaneidade da reclamación presentada, por incompetencia manifesta e por desistencia da persoa interesada.
NOVA ETAPA
Asemade, tamén se deu visto e prace á adhesión da Comisión galega á Conferencia de Órganos Garantes de Transparencia e o Dereito de Acceso á Información Pública (COTAI), entidade xurdida hai un ano e que, neste exercicio, está presida pola Comisión de Garantía do Dereito de Acceso á Información Pública (GAIP) de Cataluña.
O traslado do Comisionado da Transparencia e da Comisión da Transparencia de Galicia desde a Valedora do Pobo ao Consello Consultivo de Galicia, a través da Presidencia do máximo órgano consultivo, fíxose efectivo o pasado 1 de maio de 2026 e responde a unha modificación legal, aprobada no Parlamento de Galicia e publicada no Diario Oficial de Galicia (DOG). O órgano colexiado afronta unha nova etapa co obxectivo de axilizar e reforzar a garantía xurídica das súas resolucións para, desde o rigor técnico e xurídico, velar polos dereitos das persoas no acceso á información pública.
