- Na terceira sesión ordinaria desde maio foron resoltas 60 reclamacións e houbo 13 inadmisións
- O órgano colexiado encargado da Transparencia xestiona 430 expedientes en tres meses e da resposta en prazo a máis da metade
Santiago de Compostela, 28 de xullo de 2026.- A Comisión da Transparencia de Galicia, na que foi a súa terceira sesión ordinaria baixo a adscrición ao Consello Consultivo de Galicia, analizou para o mes de xullo algo máis de 70 expedientes, de xeito que resolveu máis de 60 reclamacións de solicitudes de información pública sobre diferentes materias e tomou nota de 13 inadmisións.
Na reunión correspondente a este mes, que se celebrou hoxe en Santiago de Compostela, a Comisión da Transparencia de Galicia aprobou un total de 61 resolucións de petición de información pública ante as Administracións galegas que, na súa maioría, facían referencia a materias contractuais, financeiras e urbanísticas; así como ao acceso a información relacionadas con construcións, entre outras.
A partir desta data, procederase a notificar aos interesados o acordo adoptado sobre a súa petición e, con posterioridade e logo da disociación dos datos de carácter persoal, as resolucións adoptadas serán publicadas na web institucional.
Asemade, a partir da sesión de maio, o órgano colexiado fixou a delegación na Presidencia da decisión sobre as resolucións de inadmisión por mor da extemporaneidade da reclamación presentada, por incompetencia manifesta e por desistencia da persoa interesada. En aplicación deste acordo, na sesión de hoxe, o presidente da Comisión da Transparencia de Galicia deu conta ao resto de membros dun total de 13 inadmisións.
VOLUME DE EXPEDIENTES
De acordo coa orde do día, unha vez analizada a proposta formulada pola secretaria da Comisión da Transparencia de Galicia, o órgano acordou ampliar o prazo máximo de tres meses para a resolución e notificación de máis de 100 expedientes, evitando que quedasen desestimadas por silencio administrativo e habilitando un tempo para a súa tramitación e resposta.
Esta decisión, fundamentada pola reorganización derivada da nova adscrición ao Consello Consultivo de Galicia e debido ao volume de expedientes tramitados e resoltos cos medios dispoñibles, foi adoptada ao amparo do artigo 23 da Lei de Procedemento Administrativo Común (LPAC).
A Comisión da Transparencia de Galicia, órgano colexiado independente e adscrito desde o 1 de maio de 2026 ao Consello Consultivo de Galicia, xestionou a recepción e tramitación de máis de 430 expedientes de petición de información pública de particulares dirixidos principalmente a concellos galegos e departamentos da Xunta. Neste tempo, do total, xa foron resoltos en prazo legal máis da metade das peticións, en concreto, máis de 220 expedientes.
Nesta nova etapa, de xeito simultáneo á actividade resolutoria ordinaria, desenvolvéronse os traballos técnicos e informáticos necesarios para a aprobación do modelo normalizado de reclamación perante a Comisión da Transparencia de Galicia fronte ás resolucións de acceso á información pública e foi habilitado na sede electrónica da Xunta. Estes traballos, de carácter instrumental, foron imprescindibles para facilitar a presentación electrónica das reclamacións e mellorar a atención á cidadanía.
Por último, nesta terceira reunión da Comisión da Transparencia de Galicia, quedou aprobada a acta da sesión anterior, como paso previo á súa publicación na web institucional, tal e como está previsto nas normas de funcionamento. Por último, tamén se abordou a posible data para a seguinte convocatoria no mes de setembro.
