O órgano colexiado adscrito ao Consello Consultivo de Galicia recoñeceu en preto o 70 por cento dos casos o dereito total ou parcial do acceso á información
Santiago de Compostela, 4 de novembro de 2026.- A Comisión da Transparencia de Galicia, baixo a adscrición ao Consello Consultivo de Galicia, resolveu desde o 1 de maio e ata finais de outubro deste ano un total de 371 expedientes de petición de información pública de particulares dirixidos principalmente a concellos galegos e departamentos da Xunta.
A Comisión da Transparencia de Galicia, órgano colexiado independente e adscrito desde o 1 de maio de 2026 ao Consello Consultivo de Galicia, xestionou desde entón e ata outubro a recepción e tramitación de preto de 700 expedientes. En concreto, cando xa se cumpriron seis meses de actividade desde comezos de maio tiveron entrada uns 518 expedientes, aos que houbo que engadir os 181 expedientes recibidos na Valedora do Pobo e que, dado que quedaron sen resolver por esa institución, foron asumidos baixo a nova etapa polo órgano adscrito ao Consultivo.
Nestes meses, do total de reclamacións, xa foron resoltas en prazo legal uns 371 expedientes, incluíndo inadmisións e arquivos. En canto a distribución das reclamacións resoltas pola Comisión da Transparencia houbo 259 estimacións (70% do total). E dicir, 7 de cada 10 reclamacións resoltas concluíron co recoñecemento, total ou parcial, do dereito de acceso da persoa reclamante. Ademais, ata finais de outubro houbo 55 inadmisións e desistimentos (15%), 40 desestimacións (11%) e 17 arquivos (4%).
O volume de actividade da Comisión da Transparencia de Galicia, tal e como ocorre con outros órganos semellantes tanto no Estado como noutras comunidades autónomas, está a crecer de modo significativo. Neste sentido, unha estimación provisional apunta a que se pode pechar o ano con 900 ou 1.000 expedientes.
