- Nunha nova sesión ordinaria desde maio foron resoltas máis de 60 reclamacións e tomou coñecemento de 18 inadmisións
- O órgano colexiado encargado da Transparencia xestiona entre maio e setembro preto de 600 expedientes e da resposta en prazo á metade
Santiago de Compostela, 22 de setembro de 2026.- A Comisión da Transparencia de Galicia, na que foi a súa cuarta sesión ordinaria baixo a adscrición ao Consello Consultivo de Galicia, analizou para o mes de setembro uns 80 expedientes, de xeito que resolveu 61 reclamacións de solicitudes de información pública sobre diferentes materias e tomou nota de 18 inadmisións.
Na reunión celebrada tras o verán, que tivo lugar hoxe en Santiago de Compostela, a Comisión da Transparencia de Galicia aprobou un novo grupo de resolucións de reclamacións de petición de información pública ante as Administracións galegas. A maioría delas facían referencia a materias contractuais, financeiras e urbanísticas; así como ao acceso a información relacionada con expedientes sancionadores ou datos estatísticos, entre outras.
Segundo o previsto en materia de funcionamento da Comisión, a partir da data da celebración desta sesión, procederase a notificar aos interesados o acordo adoptado sobre a súa petición. Con posterioridade e logo da disociación dos datos de carácter persoal, as resolucións adoptadas serán publicadas na web institucional.
Asemade, a partir da sesión de maio, o órgano colexiado fixou a delegación na Presidencia da decisión sobre as resolucións de inadmisión por mor da extemporaneidade da reclamación presentada, por incompetencia manifesta e por desistencia da persoa interesada. En aplicación deste acordo, na sesión de hoxe, o presidente da Comisión da Transparencia de Galicia deu conta ao resto de membros dun total de 18 inadmisións.
AMPLIACIÓN DE PRAZOS
De acordo coa orde do día, unha vez analizada a proposta formulada pola secretaria da Comisión da Transparencia de Galicia, o órgano acordou ampliar o prazo máximo de tres meses para a resolución e notificación de máis de 100 expedientes, evitando que quedasen desestimadas por silencio administrativo e habilitando un tempo para a súa tramitación e resposta.
Esta decisión, fundamentada pola reorganización derivada da nova adscrición ao Consello Consultivo de Galicia e debido ao volume de expedientes tramitados e resoltos cos medios dispoñibles, foi adoptada ao amparo do artigo 23 da Lei de Procedemento Administrativo Común (LPAC).
A Comisión da Transparencia de Galicia, órgano colexiado independente e adscrito desde o 1 de maio de 2026 ao Consello Consultivo de Galicia, xestionou a recepción e tramitación duns 580 expedientes de petición de información pública de particulares dirixidos principalmente a concellos galegos e departamentos da Xunta. Neste tempo, do total, xa foron resoltos en prazo legal sobre a metade das peticións, uns 300 expedientes.
Por último, nesta nova reunión da Comisión da Transparencia de Galicia, quedou aprobada a acta da sesión anterior, como paso previo á súa publicación na web institucional, tal e como está previsto nas normas de funcionamento. Por último, tamén se abordou a posible data para a seguinte convocatoria no mes de outubro.
