Barcelona acolle aos órganos garantes da transparencia nunhas xornadas para o intercambio de boas prácticas ante desafíos comúns como a IA
Santiago de Compostela, 4 de xuño de 2026.- A Comisión da Transparencia de Galicia, órgano colexiado independente adscrito ao Consello Consultivo de Galicia, formaliza estes días en Barcelona a súa incorporación á Conferencia de Órganos Garantes da Transparencia e o Acceso á Información Pública (COTAI). As xornadas desta entidade serven de espazo de colaboración e intercambio de boas prácticas, así como para reflexión sobre os retos a afrontar.
A secretaria da Comisión da Transparencia de Galicia, a letrada Ana López Guizán, representa ao órgano galego nas Xornadas da COTAI, que se celebran na cidade condal hoxe e mañá. Trátase dun encontro no que delegados dos organismos encargados de garantir a transparencia e o dereito de acceso á información pública en España reforzarán a cooperación a través do intercambio de coñecementos e experiencias que permitan afrontar os desafíos comúns, entre eles, o uso da Intelixencia Artificial (IA).
As xornadas, organizadas este ano pola GAIP (Comissió de Garantía del Dret D’Accés a la Informació Pública) de Cataluña, estrutúranse en torno a un programa de traballo técnico que inclúe reunións plenarias, presentacións especializadas e espazos de debate dirixidos a compartir boas prácticas e fortalecer a coordinación institucional.
No primeiro día deste encontro, a COTAI celebrou a súa sesión plenaria na que, como puntos do día, se abordaron cuestións como a adhesión de novos membros á Conferencia e a proposta de creación dun espazo dixital compartido da COTAI, así como o interese sobre temas futuros e suxestións en aquelas cuestións que afectan aos órganos garantes da transparencia e o acceso á información pública. Tamén se acordou celebrar en Canarias o encontro previsto para 2027.
ADHESIÓN FORMAL
Precisamente, Galicia está representada por primeira vez nestes encontros da COTAI e adheriuse formalmente a esta organización en cumprimento do acordo acadado na primeira sesión da Comisión da Transparencia, baixo a adscrición ao Consello Consultivo, celebrada a semana pasada en Santiago de Compostela.
A Comisión da Transparencia de Galicia considerou de interese sumarse á organización que agrupa aos diferentes órganos garantes da transparencia que operan no conxunto de España. Precisamente, acudir ás Xornadas da COTAI permitiu á representante galega coñecer, entre outras cuestións, os avances en intelixencia artificial aplicada á avaliación da transparencia, con especial atención á experiencia exposta polo Comisionado da Transparencia de Canarias.
Xunto á sesión plenaria da COTAI, no primeiro día destas xornadas houbo tempo para coñecer outros traballos en diferentes presentacións relacionadas coa transparencia e tamén para a celebración de actos de carácter institucional. Todo isto terá continuidade este mesmo venres, con mais sesións técnicas, neste caso, centradas no ámbito de acceso á información pública.
COTAI constituíuse formalmente en maio de 2025, en Toledo. Xurdiu a proposta do Consello Rexional de Transparencia e Bo Goberno de Castilla-La Mancha como unha nova entidade de colaboración e cooperación horizontal entre os diversos órganos garantes da transparencia e o dereito de acceso á información pública nos distintos niveis do Estado.
