Andrés Lago trasladou a Alberto Varela os traballos desenvolvidos desde maio polo órgano colexiado independente adscrito ao Consello Consultivo de Galicia
Santiago de Compostela, 21 de xullo de 2026.- A Comisión da Transparencia de Galicia, órgano colexiado independente adscrito ao Consello Consultivo de Galicia, e a Federación Galega de Municipios e Provincias (Fegamp) intensificarán a colaboración en materia de tramitación e resolución das solicitudes de acceso á información pública no eido local.
O presidente do Consello Consultivo de Galicia e comisionado da Transparencia, Andrés Lago Louro, mantivo hoxe, en Santiago de Compostela, unha xuntanza co presidente da Fegamp e alcalde de Vilagarcía de Arousa, Alberto Varela Paz. Ambos estiveron acompañados pola secretaria xeral do Consello Consultivo de Galicia, Patricia Roiloa, e a secretaria da Comisión da Transparencia de Galicia, Ana Mª López Guizán, e pola secretaria xeral de federación municipalista, Patricia Vidán.
O encontro, impulsado polo presidente do Consello Consultivo de Galicia e comisionado da Transparencia, serviu para intercambiar experiencias sobre o marco normativo e xurídico con repercusión sobre a actividade municipal. De xeito especial, abordaron os aspectos relacionados coa materia de transparencia e co acceso á información pública, ademais de analizar os procedementos polos que os concellos galegos atenden as solicitudes de datos oficiais.
Andrés Lago trasladou aos representantes da Fegamp o traballo que está a desenvolver a Comisión de Transparencia de Galicia desde o 1 de maio de 2026, data na que o órgano colexiado independente galego encargado de que as administracións respecten o dereito de acceso á información pública que ten toda a cidadanía pasou a estar adscrito ao Consello Consultivo de Galicia.
Desde maio, e á espera da celebración da sesión correspondente a xullo, o órgano colexiado independente adscrito ao Consello Consultivo de Galicia realizou dúas reunións de traballo, que implicaron a aprobación dunhas 125 resolucións de petición de información pública ante as Administracións galegas, moitas delas formuladas ante concellos.
CONVENIO CONSULTIVO E FEGAMP
Previo a este paso, o personal da Comisión da Transparencia e das Administracións locais desenvolven un amplo traballo de xestión documental, co obxectivo de atender con garantías xurídico-administrativas a demanda dos particulares que se acollen ao previsto nas normativas de procedemento administrativo e de transparencia e bo goberno.
Neste contexto, Andrés Lago e Alberto Varela abordaron a posibilidade de asinar un novo convenio de colaboración entre o Consultivo de Galicia, como órgano ao que está adscrito a Comisión da Transparencia de Galicia, e a Fegamp. O obxectivo é manter e mellorar a colaboración no asesoramento xurídico e administrativo aos concellos galegos.
Asemade, en materia de transparencia, a cooperación estará encamiñada a propiciar a realización de formación específica para facilitar aos concellos as súas funcións na resolución de reclamacións, ademais de ofrecer asesoramento e orientación sobre a aplicación e interpretación dos ditames do Consello da Transparencia e Bo Goberno (CTBG).
Precisamente, a reunión de traballo de hoxe serviu para intercambiar impresións sobre os procedementos de tramitación para o acceso a información pública co reto de identificar as posibles melloras que redunden en beneficio das Administracións e da cidadanía.
