O órgano colexiado independente resolve máis de 70 reclamacións de petición de información pública ante as Administracións galegas
Santiago de Compostela, 23 de xuño de 2026.- A Comisión da Transparencia de Galicia desenvolveu hoxe a súa segunda sesión de traballo desde que, a comezos do mes de maio, este órgano colexiado independente foi adscrito ao Consello Consultivo de Galicia. A xuntanza aprobou un novo regulamento interno para o órgano colexiado e tamén foron resoltas máis de 70 reclamacións de solicitudes de información pública sobre diferentes materias.
A sesión correspondente ao mes de xuño, que se celebrou en Santiago de Compostela, serviu para dar o visto e prace a un novo Regulamento interno de organización e funcionamento da Comisión da Transparencia de Galicia, acorde coa recente entrada en vigor da adscrición da mesma ao Consello Consultivo de Galicia. O texto acordado hoxe, que xa é de aplicación, será remitido para a súa publicación no Diario Oficial de Galicia (DOG) .
Coas normas internas, tal e como se recolle na propia exposición de motivos, preténdese acadar “un máis áxil e eficiente desenvolvemento do traballo do órgano colexiado e, por extensión, converter a Comisión nun instrumento activo na procura da transparencia na actuación das administracións públicas”.
A estrutura do novo regulamento consta de exposición de motivos, 3 capítulos e 17 artigos. O documento, que lembra o marco vixente en materia de Transparencia e Bo Goberno e da propia creación da Comisión da Transparencia de Galicia, recolle as normas internas a aplicar organizadas baixo os epígrafes de “Disposicións Xerais”, “Composición” e “Funcionamento e procedemento”.
RESOLUCIÓN DE RECLAMACIÓNS
Entre os asuntos da orde do día que foron abordados, a Comisión da Transparencia de Galicia aprobou un total de 73 resolucións de petición de información pública ante as Administracións galegas que, na súa maioría, facían referencia a materias contractuais, financeiras e urbanísticas; así como ao acceso a información ambiental. A partir desta data, procederase a notificar aos interesados o acordo adoptado para, con posterioridade e logo de disociación dos datos de carácter persoal, publicar a resolucións na web institucional.
Na reunión celebrada o pasado maio, o órgano colexiado determinou a delegación na Presidencia da Comisión da Transparencia das resolucións de inadmisión por mor da extemporaneidade da reclamación presentada, por incompetencia manifesta e por desistencia da persoa interesada. O DOG publicou o pasado 16 de xuño, a resolución con este acordo e, en aplicación do mesmo, na sesión de hoxe, o presidente da Comisión da Transparencia de Galicia deu conta ao resto de membros dun total de 6 inadmisións.
NOVA ETAPA
Asemade, nesta segunda reunión da Comisión da Transparencia de Galicia, quedou aprobada a acta da sesión anterior, como paso previo á súa publicación na web institucional, tal e como está previsto nas normas de funcionamento. Por último, tamén se abordou a posible data para a seguinte convocatoria no mes de xullo.
O traslado do Comisionado da Transparencia e da Comisión da Transparencia de Galicia desde a Valedora do Pobo ao Consello Consultivo de Galicia, a través da Presidencia do máximo órgano consultivo, fíxose efectivo o pasado 1 de maio de 2026 e responde a unha modificación legal, aprobada no Parlamento de Galicia e publicada no DOG. O órgano colexiado afronta unha nova etapa co obxectivo de axilizar e reforzar a garantía xurídica das súas resolucións para, desde o rigor técnico e xurídico, velar polos dereitos das persoas no acceso á información pública.
