Unha nova sesión ordinaria do órgano colexiado encargado da Transparencia toma nota de 10 inadmisións
Santiago de Compostela, 26 de outubro de 2026.- A Comisión da Transparencia de Galicia, na que foi a súa quinta sesión ordinaria baixo a adscrición ao Consello Consultivo de Galicia, analizou para o mes de outubro algo máis de 60 expedientes, de xeito que resolveu 52 reclamacións de solicitudes de información pública sobre diferentes materias, fixo dúas correccións de erros e tivo constancia de 10 inadmisións.
Na reunión celebrada hoxe en Santiago de Compostela, a Comisión da Transparencia de Galicia tomou decisión sobre un novo grupo de resolucións de reclamacións de petición de información pública ante as Administracións galegas. A maioría delas facían referencia a materias contractuais, financeiras e urbanísticas; así como ao acceso a información relacionada con expedientes de plantas de transformación de materia orgánica e con peticións de documentación no eido de tratamento de augas, entre outras.
Tal e como está previsto en materia de funcionamento da Comisión, a partir da data da celebración desta sesión, procederase a notificar aos interesados o acordo adoptado sobre a súa petición. Con posterioridade e logo da disociación dos datos de carácter persoal, as resolucións adoptadas serán publicadas na web institucional.
En aplicación dunha delegación do órgano colexiado, na sesión de hoxe, o presidente da Comisión da Transparencia de Galicia deu conta ao resto de membros dun total de 10 resolucións de inadmisións. As mesmas están xustificadas por mor da extemporaneidade da reclamación presentada, por incompetencia manifesta e/ou por desistencia da persoa interesada.
ACTIVIDADE
Asemade, de acordo coa orde do día, unha vez analizada a proposta formulada pola secretaria da Comisión da Transparencia de Galicia, o órgano decidiu ampliar o prazo máximo de tres meses para a resolución e notificación duns 80 expedientes, evitando que quedasen desestimados por silencio administrativo e habilitando un tempo para a súa tramitación e resposta.
Este acordo, fundamentado na reorganización derivada da nova adscrición ao Consello Consultivo de Galicia e debido ao volume de expedientes tramitados e resoltos cos medios dispoñibles, foi adoptado ao amparo do artigo 23 da Lei de Procedemento Administrativo Común (LPAC).
A Comisión da Transparencia de Galicia, órgano colexiado independente e adscrito desde o 1 de maio de 2026 ao Consello Consultivo de Galicia, xestionou desde entón e ata outubro a recepción e tramitación de preto de 649 expedientes de petición de información pública de particulares dirixidos principalmente a concellos galegos e departamentos da Xunta. Nestes meses, do total, xa foron resoltos en prazo legal sobre a metade das peticións, uns 370 expedientes, incluíndo inadmisións e arquivos.
Por último, nesta nova reunión da Comisión da Transparencia de Galicia, quedou aprobada a acta da sesión anterior, como paso previo á súa publicación na web institucional, tal e como está previsto nas normas de funcionamento. Tamén se abordou a posible data para a seguinte convocatoria no mes de novembro.
