Reclamante: Expediente RSCTG 48/2017 ASUNTO: Resolución da Comisión da Transparencia de Galicia na reclamación presentada ao amparo do artigo 28 da Lei 1/2016, do 18 de xaneiro, de transparencia e bo goberno En resposta á reclamación presentada por, representado por , mediante escrito do 5 de maio de 2017, a Comisión da Transparencia, considerando os antecedentes e fundamentos xurídicos que se especifican a continuación, adopta a seguinte resolución: ANTECEDENTES Primeiro. D. presentou, mediante escrito con entrada no rexistro da Xunta de Galicia o día 14 de febreiro de 2017, unha solicitude de acceso á información pública, en representación de ao amparo do disposto no artigo 26 da Lei 1/2016, do 18 de xaneiro, de transparencia e bo goberno, para recibir información sobre os letrados e letradas da Xunta de Galicia e as compatibilidades concedidas pola administración. Con data de 16 de marzo de 2017 suspéndese o prazo para resolver a solicitude de acceso á información pública presentada por para darlle traslado ao agora reclamante, funcionario do corpo de letrados cunha compatibilidade en vigor. Con data de 6 de abril de 2017 o agora reclamante realizaba unhas alegacións nas que indicaba que se descoñecía o interese que puidese ter o solicitante “xa que non mantemos absolutamente ningunha relación persoal ou profesional co mesmo”, tamén manifestaba que tendo en conta o dereito prevalente á protección de datos procede “coidarse que a que se entregue sexa relevante para a participación e control do funcionamento da Administración autonómica por parte do peticionario”, indicando que lle parece suficiente con referirse ao número de rexistro de persoal evitando un listado antroponímico ou patronímico individualizado facilitado pola propia administración. Entendía igualmente que “ en ningún caso se debe facilitar información que afecte a intereses de todos e cada un dos letrados, sen consentimento dos mesmos, tendo en conta ademais o disposto na Lei Orgánica 15/1999, do 13 de decembro, de protección de datos de carácter persoal”. Con data de 6 de abril de 2017 a Dirección Xeral da Asesoría Xurídica, resolve con estimación parcial o acceso, dando, entre outros, datos varios que se corresponden coa compatibilidade da persoa que agora reclama. A resolución é notificada ao letrado da Xunta e recibida o 7 de abril de 2017. O 5 de maio de 2017, , en nome e representación de , diríxese á Comisión da Transparencia coa seguinte reclamación “a estimación da reclamación que formulamos e de acordo cos argumentos que figuran no presente escrito e en contra do manifestado na Resolución da Dirección Xeral da Asesoría Xurídica Xeral sobre a solicitude de acceso á información pública, e se anule e declare nulo o referido acto administrativo de información resolución da Dirección Xeral da Asesoría Xurídica de 6 de abril de 2017.” Segundo. Con data de 10 de maio de 2017 déuselle traslado da documentación achegada polo interesado á Asesoría Xurídica Xeral da Xunta de Galicia para que, en cumprimento da normativa de transparencia, achegue informe e copia completa e ordenada do expediente. A recepción da solicitude pola administración foi o 18 de maio de 2017. Terceiro. Con data de 6 de xuño de 2017 recibiuse o informe e o expediente íntegro. Cuarto. Na sesión XV, celebrada o día 5 de outubro de 2017, pola Comisión da Transparencia acordouse que o expediente RSCTG 48/2017, se retirase da sesión co fin de que “se proceda a identificar a terceiros interesados e darlle aos mesmos o trámite de audiencia previsto nos artigos 22.4 da Lei 19/2013, do 9 de decembro, e a disposición adicional cuarta da Lei 1/2016, do 18 de xaneiro”. Quinto. O 11 de outubro de 2017 se lle notificou ao reclamante que se procedía a apertura dun trámite a terceiro interesado ante un recurso potestativo de acceso á información pública. A recepción do oficio foi o 18 de outubro de 2017. Sexto. O mesmo 11 de outubro se notificaba ao terceiro a apertura dun trámite de audiencia tendo en conta que o procedemento administrativo dos artigos 28.3 da Lei 1/2016, do 18 de xaneiro e o artigo 24 da Lei 19/2013, do 9 de decembro prevén que se a denegación do acceso á información se fundamenta na protección de intereses de terceiros, outorgarase trámite de audiencia ás persoas que puideran resultar afectadas para que aleguen o que ao seu dereito conveña. A recepción do oficio foi o 16 de outubro de 2017. Sétimo. O terceiro non fai alegacións, mais o reclamante neste expediente dirixe un escrito recibido o 3 de novembro, mais selado en correos con data do 31 de outubro de 2017 co seguinte alegato; a Lei Orgánica 15/1999, do 13 de decembro, de Protección de datos de Carácter Persoal, establece que o obxecto desta Lei é garantir e protexer no que concerne ao tratamento dos datos persoais, (...) e especialmente a intimidade persoal. Solicitando que o que se achegue sexa relevante para o control do funcionamento da administración por parte do peticionario, indicando que sería suficiente facilitar como moito o número de rexistro de persoal dos letrados e letradas. O terceiro interesado entende que ao tratarse dunha lei orgánica debe prevalecer sobre contido da Lei de transparencia: debéndose preservar, na medida do posible, o dereito á intimidade dos letrados/as da Xunta de Galicia; e para poder preservar que a información que se facilita sexa veraz, correcta e pertinente, debe entregarse coas garantías inherentes, non só ao fomento da transparencia, senón tamén co dereito prevalente, á protección de datos de carácter persoal. FUNDAMENTOS XURÍDICOS A lexislación aplicable a este procedemento vén configurada pola Lei 19/2013, de 9 de decembro, de transparencia, acceso á información pública e bo goberno, de carácter básico, e a Lei 1/2016, do 18 de xaneiro, de transparencia e bo goberno da Comunidade Autónoma de Galicia, xunto coa lexislación básica en materia de procedemento administrativo á que se remiten as anteriores. Primeiro.- Competencia O artigo 28 da Lei 1/2016, do 18 de xaneiro, de transparencia e bo goberno, establece que, contra toda resolución expresa ou presunta en materia de acceso á información pública, poderá interpoñerse unha reclamación perante o Valedor do Pobo. O artigo 33 da Lei 1/2016, do 18 de xaneiro, de transparencia e bo goberno, indica que corresponde á Comisión da Transparencia a resolución das reclamacións fronte ás resolucións de acceso á información pública que establece o artigo 28 da Lei 1/2016, do 18 de xaneiro, de transparencia e bo goberno. O artigo 24 da Lei 19/2013, do 9 de decembro, establece que , contra toda resolución expresa ou presunta en materia de acceso poderá interpoñerse unha reclamación ante o Consejo de Transparencia y Buen Gobierno, con carácter potestativo e previa a súa impugnación en vía contencioso-administrativa. Esta mesma lei, na súa disposición adicional cuarta establece que a resolución da reclamación prevista no artigo 24 corresponderá, nos supostos de resolucións ditadas polas Administracións das Comunidades autónomas e o seu sector público, e polas Entidades Locais comprendidas no seu ámbito territorial, ao órgano independente que determinen as Comunidades Autónomas, por tanto as competencias nas materias que corresponden á Administración Xeral do Estado son sempre competencia do Consejo de Transparencia y Buen Gobierno. Segundo.- Exercicio do dereito de acceso á información pública O artigo 17.1 da Lei 19/2013, do 9 de decembro establece que o procedemento para o exercicio do dereito de acceso se iniciará coa presentación da correspondente solicitude, que deberá dirixirse ao titular do órgano administrativo ou entidade que posúa a información. Terceiro.- Procedemento aplicable O artigo 28.3 da Lei 1/2016, do 18 de xaneiro, de transparencia e bo goberno preceptúa que o seu procedemento se axustará ao previsto nos números 2, 3, e 4 do artigo 24 da Lei 19/2013, de 9 de decembro, de transparencia, acceso á información pública e bo goberno, para as reclamacións perante o Consejo de Transparencia y Buen Gobierno. A Lei 19/2013, do 9 de decembro, pola súa parte, sinala que estamos ante unha reclamación con carácter potestativo e previo á súa impugnación en vía contencioso-administrativa, e que se axustará na súa tramitación ao disposto na lexislación de procedemento administrativo común en materia de recursos. Cuarto.- Análise do expediente Non se pode entrar no fondo do asunto dado que tras a revisión do o informe, o expediente e as alegacións detéctase que o agora reclamante non exercitou o seu dereito de acceso á información pública, senón que solicita á Comisión que se anule ou modifique a Resolución da Dirección Xeral da Asesoría Xurídica ante a solicitude de información pública de RSCTG 39/2017, para un dato, as compatibilidades que son obxecto de publicidade activa. A reclamación formulada á Comisión da Transparencia non entra dentro das competencias que os artigos 33 e 32 atribúen ao Valedor do Pobo como Comisión da Transparencia nin como Comisionado da Transparencia. Tal como di o informe da Asesoría Xurídica “De acordo coa normativa básica e autonómica en materia de transparencia, a publicidade activa e o dereito de acceso á información son dúas caras da mesma realidade: a transparencia da actividade pública. Se ben, tal como xa sinalou o CTBG, compre salientar o diferente fundamento xurídico no cal se sustentan un e outro concepto. Nun caso se configura coma unha obriga das institucións e Administracións Públicas (a publicidade activa), mentres que noutro caso -o acceso á información ou transparencia pasiva- se configura coma un dereito das persoas, baseado no artigo 105 b) da Constitución. En ambos casos a finalidade da transparencia é garantir que os cidadáns coñezan a organización e o funcionamento das institucións públicas.”. Pois ben, o capítulo II da Lei 19/2013, do 9 de decembro, recolle no artigo 8 1. g) que deben facerse públicos as resolucións de autorización ou recoñecemento de compatibilidade que afecten aos empregados públicos así como as que autoricen o exercicio de actividade privada ao cese dos altos cargos da Administración Xeral do Estado ou asimilados segundo a normativa autonómica ou local. Este capítulo obriga as Administracións Públicas a publicar as resolucións de autorización de compatibilidade. Quinto.- En conclusión procede inadmitir a reclamación presentada por , en representación de , por tratarse dunha petición na que esta comisión carece de competencias ao atribuírse a este órgano a declaración de anulabilidade ou nulidade dunha resolución administrativa na que se lle citou, como terceiro afectado e en relación a unha materia que é obxecto de publicidade activa, polo que de existir algún impedimento para a súa difusión xa debería ter sido manifestado polo terceiro no momento de facer a solicitude de compatibilidade e non durante a solicitude de acceso a información. A Comisión da Transparencia, en atención aos anteriores antecedentes e fundamentos xurídicos, ACORDA Inadmitir a reclamación presentada por , en representación de con data de 5 de maio de 2017, por carecer de competencias para declarar a anulabilidade ou nulidade dunha reclamación administrativa emitida pola Xunta de Galicia para informar sobre unha compatibilidade que é obxecto de publicidade activa. Contra esta resolución, que pon fin á vía administrativa, unicamente cabe, en caso de desconformidade, interpoñer recurso contencioso-administrativo, no prazo de dous meses, contados desde o día seguinte á notificación desta resolución, de conformidade co previsto no artigo 8.2 a Lei 29/1998, do 13 de xullo, reguladora da xurisdición contencioso- administrativa. Santiago de Compostela, 720 de decembro de 2017 A presidenta da Comisión da Transparencia Milagros Otero Parga