Defensores do pobo de toda España reúnense o 3 e 4 de outubro  no Parlamento de Galicia no marco das súas XXXII Xornadas de Coordinación. A sesión inaugural contará coa presenza do defensor del pueblo en funcións, Francisco Fernández Marugán, que estará acompañado polo presidente do Parlamento de Galicia e a valedora do pobo.


Santiago de Compostela, 2 de outubro de 2017
. O Parlamento de Galicia acollerá os próximos 3 e 4 de outubro as XXXII Xornadas de Coordinación de Defensores do Pobo que nesta ocasión terán por tema “O dereito de acceso á información pública e transparencia”. A institución do Valedor do Pobo é a responsable de organizar esta xuntanza anual na que toman parte representantes do Defensor del Pueblo e das 9 valedorías autonómicas españolas.

O presidente do Parlamento de Galicia, Miguel Ángel Santalices, será o encargado de inaugurar as xornadas, acompañado do defensor do pobo en funcións, Francisco Fernández Marugán e da valedora do pobo, Milagros Otero Parga.

As xornadas celebraranse no Pazo do Hórreo, sede do Parlamento de Galicia. Ao longo de de dous días, representantes das valedorías de toda España e outras voces acreditadas someterán a análise, entre outras cuestións, a importancia da transparencia como elemento para o exercicio de dereitos así como o papel protagonista dos defensores nesta materia.

Javier Amorós Dorda, subdirector general de Transparencia y Buen Gobierno, pronunciará a conferencia inaugural co título: “A transparencia 2.0: do cumprimento á devoción”.

Celebraranse dúas mesas de traballo moderadas respectivamente polo Ararteko do País Vasco, Manuel Lezertua Rodríguez e polo Diputado del Común de Canarias, Jerónimo Saavedra. Nas mesmas intervirán representantes de toda as valedorías e expertos na materia coma o alcalde de Ermua, Carlos Totorika Izagirre ou o director do Consejo de Transparencia y Protección de Datos de Andalucía, Manuel Medina.

A segunda xornada centrarase de dar a coñecer aos asistentes as conclusións acadadas por todas as defensorías sobre a transparencia e o dereito á información pública no taller preparatorio das xornadas celebrado a pasada primavera en León. Tras a clausura do encontro, os titulares das diferentes valedorías manterán un último encontro de coordinación que se celebrará na Biblioteca do Pazo do Hórreo.

As xornadas de coordinación de defensores celébranse por estas datas desde hai 32 anos. Trátase dunha das citas más relevantes no ámbito das defensorías do pobo, que seguen un sistema de turnos para a súa organización.

Ademais da institución do Defensor del Pueblo, existen na actualidade outras 9 valedorías autonómicas que estarán representadas nas xornadas: Andalucía, Cataluña, Galicia, Canarias, País Vasco, Aragón, Comunidade Valenciana, Castela e León e Navarra.

É a segunda vez que Santiago de Compostela acolle as xornadas. As conclusións das mesmas, sempre plasmadas nun documento asinado por todos os defensores do pobo,  convértense en referencia da análise do estado de vixencia dos diferentes dereitos no territorio español.

Programa das xornadas: http://www.valedordopobo.gal/xornadas-de-coordinacion-de-defensores-do-pobo-2017/