A valedora do pobo e presidenta da Comisión da Transparencia, Milagros Otero Parga, participará o próximo 27 de setembro en Madrid (Universidad Complutense) no II Congreso Internacional de Transparencia (CIT). O evento celébrase durante tres xornadas, do 27 ao 29 de setembro de 2017 na Facultade de Ciencias da Información da Universidad Complutense de Madrid.

O CIT é o Congreso Internacional de Transparencia, que no ano 2016 celebrou a súa primeira edición. Nesa ocasión conseguiu unha asistencia de máis de 250 persoas e a presentación dun cento de comunicacións por parte dos grupos de traballo. Este ano, a valedora do pobo, Milagros Otero Parga, é unha das invitadas a participar na mesa de debate sobre a actividade dos órganos garantes do dereito de acceso que se celebrará o 27 de setembro ás 11.45 horas. Na mesma terá ocasión de debater cos seus homólogos responsables dos órganos de control do País Vasco, Canarias, Aragón, Comunidade Valenciana, Andalucía, Murcia e Cataluña.

O congreso contará coa presenza de participantes latinoamericanos e permitirá aos asistentes coñecer o marco xurídico e político en diferentes países e intercambiar experiencias e reflexións que poderán mellorar a transparencia pública.

Máis información e programa na seguinte ligazón: http://congresotransparencia.com/